Se queredes compartir o voso tempo de lecer coas vosas fillas e fillos e facelo en galego, o Auditorio de Ourense ten unha programación infantil ben interesante.
O primeiro venres de mes, na Sala Apego, actividades para nenxs de 0 a 3 anos. Elxs entran de balde, as persoas adultas pagamos unha entrada de 3€.
Neste curso tamén vos ofrecemos a posibilidade de participar no Premio literario Frei Martín Sarmiento, que consiste en ler ao longo do curso dúas obras en galego e puntualas de 0 a 10.
A participación do alumnado xestiónase desde o profesorado de EI, EP e ESO-Bac. As persoas adultas que queirades participar podedes inscribirvos a través da circular que vos entregamos na reunión de inicio de curso (se non a tedes, podedes coller unha en Secretaría).
As obras seleccionadas este curso son:
* RIVEIRO COELLO, ANTÓN; A ferida do vento; Ed. Galaxia.
* FRAGA, ANTONIO M. ; A virxe das areas; Edicións Embora.
Se che gusta ler, anímate e participa. O teu exemplo é a mellor campaña de fomento da lectura!
Benvidas e benvidos un curso máis ao blog do EDLG (para quen sexades novxs, o Equipo de Dinamización da Lingua Galega) de Salesianos Ourense.
A través desta canle queremos darvos a coñecer actividades para o fomento do uso do galego, tanto propias do equipo como outras organizadas por outros colectivos que teñan como finalidade promover o uso da lingua galega en todos os ámbitos.
Podedes enviarnos achegas, comentarios, recursos... A idea é que este ano sexamos máis persoas as que dinamicemos este espazo.
O vindeiro domingo, 2 de abril, ás 17:00h. no Auditorio Municipal de Ourense representarase unha adaptación da obra A galiña azul, de Carlos Casares.
Está pensada para rapazas e rapaces de 6 a 10 anos, acompañados polas súas familias.
É unha boa oportunidade para gozar do teatro en familia e homenaxear dalgún xeito ao autor a quen este ano a Real Academia Galega lle adica o Día das Letras Galegas.
O pasado venres 24 de febreiro celebramos o Día de Rosalía no 180º aniversario do seu nacemento.
No noso cole celebrámolo pintando carautas co rostro da poeta, lendo poemas seus, vendo un vídeo conmemorativo desta celebración, tomando un chocolate e dialogando sobre como potenciar o uso do galego no noso colexio.
Para seguir celebrando este día cada día deixámosvos uns vídeos.
O primeiro para os máis pequenos da casa: "Rosalía pequeniña", publicado por Galaxia na súa colección Sonárbore. Disco-libro altamente recomendable para introducir os máis cativos no mundo da poesía.
O segundo xa para o público máis adulto: "Meniña gaiteira", interpretado por Xardín Desordenado, grupo vigués que nos acompañou o curso pasado nas nosas Xornadas da Lingua.
Desexamos que vos gusten e que sexan unha boa vía de achegamento á obra e o pensamento da nosa poeta máis internacional.
Apego é un programa colectivo creado para fomentar e mellorar a transmisión do galego como lingua inicial.
Cal é o lema deste programa?
"Apego, pola vida e pola lingua". Este
é o lema deste proxecto no que os pais e nais, e os educadores en
xeral, van atopar orgullo pola máis orixinal das nosas creacións e forza
para preservala e transmitila.
Como naceu a idea?
Naceu por iniciativa da Coordinadora de Traballadores/as de
Normalización Lingüística e desenvólvese, de xeito cooperativo, entre os
servizos de normalización dos concellos adheridos.
A quen está dirixido?
Diríxese ao contexto familiar e social dos nenos e nenas nos seus
primeiros anos de vida (0 a 6) para achegarlle argumentos e facilitarlle
ferramentas e redes que sosteñan e arroupen a crianza en galego.
Amor, arraigo, lingua, orgullo e identidade.
Apego
é empatía, vínculo, comunidade… Apego é apoio para a responsabilidade
de construír o futuro desde a raíces e a lingua propia.
Nesta ligazón poderedes atopar máis información, recursos, actividades...
Animádevos a legarlle tamén á rapazada o amor pola lingua.
